Собранискиот спикер Африм Гаши за денеска свикал седница на Комисијата за надзор на Агенцијата за национална безбедност и Агенцијата за разузнавање, но претседателот Скендер Зејд Реџепи тврди дека е на боледување по операција и дека не е во можност да ја држи истата.
„Разбрав дека има закажано седница и дека мојата комисија ја закажал Гаши по барање на третина пратеници од комисијата и сите се од ВМРО-ДПМНЕ. Јас сум на боледување околу два месеца по операција на колк и морам да мирувам. Не знам кој ќе ја води седницата, бидејќи и заменик-претседалот Блерим Беџети не е тука. Планирам да ги известам странските амбасади“, рече Скендер Зејд Реџепи во телефонска изјава за Телма.
Комисијата за надзор на тајните служби секогаш ја води како претседател – пратеник од опозицијата. Во актуелниот собраниски состав, претседателското место на оваа надзорна комисија го доби Европскиот фронт, коалиција предводена од ДУИ. Без разлика на тоа, парламентарното мнозинство го има и мнозинството во оваа надзорна комисија. Гаши сега ја назначил пратеничката од СДСМ, Славјанка Петровска да ја води седницата која била свикана по деловничка одредба дека тој има право да свика седница на работно тело во случај работното тело да нема претседател или кога претседателот не свикува седница, а е должен да ја свика.