Дел од јагнињата во штипско и радовишко останаа непродадени. Сточарите тврдат дека годинава работеле колку да преживеат. Во нивните бачила иако е март се уште има јагниња, кои чекаат да се откупат. Велат веќе и пораснале, па откупците и не сакаат да ги земат.
Цената во кланиците се движи од 220 до 230 денари жива мера, што за нив е неисплатлива, додека кај приватните откупувачи е 300 денари, но доколку ги продадат на нив, во тој случај не им следува субвенции.
Лани јагнињата се продаваа по цена од 300 денари за килограм жива мера, со што годинава речиси за една третина е намалена. Сточарите велат дека макотрпно работат, а исто така е и храната е скапа. Волната никој не им ја зема, а слабо оди и продажбата на сирење.
Ова е причината што низ селата во Плачковичкиот регион во штипско и радовишко од година во година се намалува бројот на овци.Сточарите бараат навремен откуп на јагнињата со цел да продолжат да работат, а цената на жива мера јагне треба да биде најмалку од 300 до 350 денари.
Викторија Јованова