Кошаркарската федерација на Македонија изминатото коло направи инспекција на салите во кои се играат натпреварите од Првата лига и денеска на состанок со клубовите од елитата ги претстави забелешките на комисијата. Четири клубови мора да ги отстранат недостатоците во своите арени до почетокот на 14.коло претстојниот викенд, а осум сали ги задоволуваат критериумите.
Работнички, Вардар, Гостивар и Куманово се клубовите во чии сали инспекцијата пронајде нерегуларности. Во салите „Младост“ во Гостивар и „Перо Наков“ во Куманово проблем се светлосните сигнали за 24 секунди и крај на времето за игра.
Во малата сала во „Кале“, каде домаќин е Вардар, а од почетокот на оваа година и Работнички, Комисијата на КФМ утврдила дека просторот од два метри кај записничката маса е помал за 50 сантиметри.
КФМ ги информирала клубовите дека доколку не ги отстранат недостатоците до почетокот на 14.коло, што е закажано за овој викенд, салите ќе бидат суспендирани и клубовите ќе мораат да бараат ново место за одигрување на натпреварите, односно сали кои ги исполнуваат критериумите од Категорија 1.
Салите на МЗТ Скопје, Тиквеш, Феникс, Кожув, ТФТ, Пелистер, Шкупи и Чаир се според правилата и пропозициите и го имаат статустот на Категорија 1.
Пред почетокот на секој натпревар во Првата лига ќе се мери и температурата во салата, па доколку таа биде под 12 целзиусови степени, натпреварот ќе се одложи за 24 часа и домаќинот ќе мора да обезбеди затоплена сала или во спротивно ќе го загуби натпреварот со службен резултат 20-0 и нема да добие бод, што го добиваат поразените екипи.