За 80 години независна Македонија, денеска за прв пат беа промовирани капитални изданија со Брајова азбука, наменети за лица со оштетен вид. Станува збор за книгите „ Приказни за Зоки Поки“, „ Сказна за детето Вилен “ и „ Белото Циганче“, чии автори се класиците на македонската литература за деца , Оливера Николова, Глигор Поповски и Видое Подгорец. Според претставникот на издавачкиот центар АЛДЕБАРАН, кој што ги објави трите изданија, потребно е интерресорски да се решат работите за да ваквите книги со Брајова азбука редовно се објавуваат.
- Што ли стана со тоа дете ? Сите викаат по Зоки Поки, а Зоки Поки од никаде не се јавува. Ах, какво дете !
Јована Трајчевска, матурантка од училиштето за рехабилитација на деца и млади со оштетен вид „ Димитар Влахов“ од Скопје, чита од новобојавената книга со Брајова азбука „ Приказни за Зоки Поки “ од Оливера Николова. Иако книгата ја знае од слушање во аудио формат, вели дека има посебна маѓија кога се чита од издание во хартиена форма.
- Ова е за мене веќе слушната приказна. Сепак ќе ги земам да ги прочитам, да се навратам на тие моменти, затоа што едно е кога нешто слушате во аудио формат, а друго е кога книгата ќе ја земете, ќе ја помирисате, ќе ја почувствувате и сами ќе ја прочитате, вели Јована Трајчевска, матурантка од училиштето „ Димитар Влахов“.
Покрај „ Приказни за Зоки Поки“, како некомерцијални , скапи изданија, денеска беа промовирани и книгите за деца со Брајово писмо „ Сказна за детето Вилен“ од Глигор Поповски и „ Белото Циганче“ од Видое Подгорец. Според претставникот на Издавачкиот центар АЛДЕБАРАН од Струга, кој што ги објави изданијата во соработка со експерти од училиштето „ Димитар Влахов“, редно време било да се објават вакви книги зашто за 8 децении независност на Македонија, од разни причини тоа било пропуштено. Стефоски кажа дека е потребно министерствата за образование, култура и социјална политика да решат некои работи, за да книгите со Брајова азбука станат секојдневие.
- Интерресорски треба да се решат некои работи за да може редовно, без некаква инцидентна основа да ги приопштуваме ваквите изданија , да бидат објавени. А, нашиот поттик беше и другите издавачи да можат да објавуваат книги, кои се дел од нивната издавачка програма. И да бидат редовно објавувани на Брајово писмо, кажа Мите Стефоски , претставник на Издавачкиот центар АЛДЕБАРАН.
Според директорката на училиштето „Димитар Влахов“, Брајовата азбука , која годинава одбележува 200 години од креирањето од страна на Луј Брај, е симбол на рамноправност, самостојност и неограничени можности за слепите лица.
- Преку овие книги , не само што ги образуваме нашите ученици , туку ги подготвуваме за живот, ги правиме независни , им ја јакнеме самодовербата, рече Александра Јаковчевска, директорка на училиштето „ Димитар Влахов“.
Објавувањето на трите книги од класиците на македонската литература за деца, го финансира Министерството за култура. Па , по еден комплет доби училиштето „ Димитар Влахов“ и Градската библиотека „ Браќа Миладиновци“, за нејзиното Брајово катче. На настанот во Градската библиотека, со пригодна програма настапија ученици од училиштето „ Димитар Влахов“.
Сотир Трајков