Српскиот претседател Александар Вучиќ тврди дека добро го познава рускиот претседател Владимир Путин и дека е убеден оти тој ќе употреби нуклеарно оружје ако сите други опции бидат исцрпени. Вучиќ предупреди дека заканата од нуклеарен конфликт е поголема од кога било досега, истакнувајќи дека и Русија и Украина ќе бидат подготвени да ги користат сите ресурси кои ги имаат во конфликтот.
Српскиот претседател истакна дека Србија е неподготвена за такви сценарија и дека капацитетите за засолништа се ограничени, па ќе биде потребно да се обнови инфраструктурата за да се сместат до милион луѓе доколку се оствари најцрното сценарио.
Вучиќ информираше и за високите нивоа на стоковите резерви, но нагласи дека не е целосно задоволен од состојбата. Во врска со актуелниот конфликт во Украина, нагласи дека Србија ја одржала својата политичка позиција во текот на војната и дека се заложувала за мир и примирје.
