Обврската за Македонија за впишување на Бугарите во Уставот останува. Ова е ставот на, Марта Кос, која попладнево ја доби довербата, односно беше потврдена како иден евркомесар за проширување од Комитетот за надворешни работи на Европскиот парламент. Кос во контекст на уставните измени на Македонија се повика на напишаното во најновиот Извештај на Комисијата за земјава.
- „Ние очекуваме дека земјата-кандидат, Северна Македонија, ќе го смени уставот како што ветила, ни повеќе ни помалку“, рече Кос, предлог за еврокомесар за проширување.
Кос денеска во неколкучасовното сослушување од европратениците зборуваше и за билатерализацијата на процесот на проширување, со став дека билатералните спорови меѓу земјите-членки и земјите-кандидати да бидат решени најбрзо што е можно за да не се блокира проширувањето и да не се поткопува довербата во процесот.
- „Интересите на земјите-членки, секако, се на прво место, но сметам, и тоа ќе биде моја работа и работа на другите колеги, да направиме се што можеме да не внесуваме билатерални прашања во процесот на проширување“, изјави Кос, предлог за еврокомесар за проширување.
За случајот на Бугарија и Македонија за кој рече дека веќе има внесување на билатерален спор, посочи дека кога ќе има процес на преговори, постојат многу повеќе алатки како да и се помогне на земјата кандидат, но и на земјата-членка да се најде решение.
- „Не постои друг начин и не можам да кажам датум, колку брзо или колку бавно ќе се развиваат работите, ни ние треба да го решиме спорот врз основа на нашите вредности. Значи, помагање на земјата-членка и помагање на земјата-кандидат ќе биде многу важен дел од мојата работа. Нема друг начин“, додаде Кос, предлог за еврокомесар за проширување.
Кос денеска пред европратениците рече дека проширувањето на Европската унија не е спринт, туку маратон. Според неа нови членки на Европската унија треба да стант само оние земји кои ги почитуваат вредностите на демократијата и владеењето на правото. Кос притоа рече дека таа поддржува амбициозност, но оти не може да има скратени патишта до членство, при што рече дека никогаш нема да прави компормис на квалитетот со брзината.
Кос која освен што одговараше на прашања за проширувањето, евроинтегративни процеси на земјите-кандидатки, како да се обезбеди да нема назадување или застој во тие процеси, одговараше и за теми поврзани со нејзините семејни бизниси и дали таа била соработник на тајните југословенски служби пред Словенија да се осамостои.
- „Јас прочитав многу нови работи за мене, работи за кои и самата не знаев. Ги сфатив сериозно иако имаше многу лаги. Да се вратам на вашето прашање. Никогаш не сум била соработник или информатор на тајната служба на Југославија. Јас сум на таа листа, но не не знам како“, изјави Кос.
Парламентарната група Обнова на Европа во Европскиот парламент и честиташе на Кос за нејзината посветеност да го искористи обновениот моментум околу проширувањето со поддржување на пристапот заснован на заслуги, при што поранешниот известувач за Македонија, Илхан Ќучук и предочи дека таа ќе се соочи со тешки задачи – да најде начин да ја врати довербата на земјите-кандидатки да ги прават работите поинаку и да продолжат на европскиот пат, но и да ги убеди земјите-членки да им веруваат на земјите кои се пред вратите на Унијата.
Тамара Грнчароска