Турскиот претседател Реџеп Таип Ердоган денеска порача дека исламските земји треба да формираат сојуз против, како што рече, „растечките закани на експанзионизмот“. Неговиот коментар следуваше по информацијата на турски и палестински официјални лица дека израелските сили убиле жена со турско-американско потекло која учествувала во протестот против ширење на населби на Западниот брег.
„Единствен чекор за запирање на израелската ароганција, израелскиот варваризам и израелскиот државен тероризам е Сојуз на изламски земји“, рече Ердоган на состанок на здружението на исламски училишта во близина на Истанбул.
Неодамнешните потези на Турција за подобрување на врските со Египет и со Сирија, како што нагласи тој, биле насочени кон „формирање на линија на солидарност против сè поголемите експанзионистички закани“.
Ергодан оваа недела беше домаќин на неговиот египетски колега, Абдел Фатах ал Сиси. Тема на разговорите беше војната во Газа, но и начините за поправање на 12-годишните замрзнати врски меѓу двете земји.
Турскиот претседател во мај најави дека „во секој момент“ ќе упати покана и до неговиот сириски колега, Башар ал Асад за можни разговори за обновување на на односите меѓу двете земји кои ги прекинаа врските во 2011 година, по избивање на граѓанската војна во Сирија.