Италијанската премиерка Џорџа Мелони вети дека „повторно ќе почне“ соработка со Кина по потпишувањето на тригодишен акционен план за нови облици на соработка за време на нејзината прва официјална посета на Пекинг по преземање на функцијата.
Таа денеска имаше средба со кинескиот премиер Ли Џианг, а ќе се сретне и со претседателот Си Џинпинг.
Таа присуствиваше и на италијанско-кинескиот бизнис форум на кој учествуваа компании – производителот на гуми „Пирели“, енергетската група ЕНИ, одбранбената група „Леонардо“, производители на вино, како и неколку италијански луксузни модни куќи како „Долче&Габана“.
„Форумот праќа уште еден сигнал на взаемен интерес за уште поголема рамнотежа на нашата комерцијална размена“, наведе Мелони.
Кина е најголем трговски партнер на Италија надвор од ЕУ, по САД.
Директните италијански инвестиции во Кина изнесуваат 15 милијарди евра, а над 1.600 италијански компании, посебно во областа на текстилната, машинската, фармацевтската, енергетската и тешката индустрија, работат со кинески партнери.
Но, Италија неодамна ја поддржа одлуката на Европската комисија за воведување на привремени царини до 37,6 отсто на електрични возила увезени од Кина.