Доналд Трамп вчера избегна атентат на политички митинг со што беше поставена тешка задача за ФБИ, да бара информации за тоа како вооружен маж може да нападне поранешен претседател на САД.
Во нападот беше убиен еден поддржувач на Трамп, а медиумите во САД веќе направија и реконструкција на атентатот.
Облечен во бела кошула и светло-црвена МАГА капа, Трамп зборуваше против илегалната имиграција кога одекнаа истрели во 18:08 часот локално време (22:08 GMT, време во Лондон).
„Погледнете што се случи…“ рече тој, а зборовите му беа прекинати потоа со четири истрели едноподруго.
Трамп се допре за десното уво додека постојано се слушаа извици -„симни се!“, пред петтиот и шестиот истрел.
Поранешниот претседател се спушти зад говорницата додека агентите на Тајната служба се движеле околу него. Во толпата се слушаат врисоци.
Во рок од четири секунди беа испукани и други истрели, што поттикна повеќе поддржувачи да легнат на земја додека дополнителни агенти брзаат на сцената.
Седумнаесет секунди по првите истрели се слушна последниот истрел.
Тројца вооружени припадници на безбедносните сили се поставија на бината 22 секунди по почетокот на пукањето.
Агентите на тајната служба набрзина споделија инструкции – како „јасни сме“ и „ајде да се движиме“ – пред да го кренат Трамп кој имаше крв на лицето.
Видлив уште еднаш околу една минута по почетокот на пукотницата, Трамп рече „дозволете ми да си ги земам чевлите“ додека агентите формираа прстен околу него. Агентите му одговорија дека мора да се блиску до него, го опколија со телата и ги кренаа рацете за да оневозможат Трамп да биде јасна цел за евентуално продолжение на нападот.
Поминаа уште 13 секунди додека Трамп не ја крена тупаницата кон толпата, која одговори со овации.
Трамп накратко застана за да ја истурка тупаницата во воздух, пред да излезе од сцената.
Непосредно пред да замине со џип и само две минути по почетокот на обидот за атентат, Трамп уште еднаш ја крена тупаницата и накратко се сврте кон толпата.
Кога автомобилот се оддалечуваше, силно вооружените безбедносни сили тргнаа на местото на настанот.
Трамп ја даде првата изјава за пукањето во 20:42 часот, објавувајќи на својата страница Truth Social.
„Бев застрелан со куршум кој го прободе горниот дел од десното уво“, напиша Трамп.
„Веднаш знаев дека нешто не е во ред со тоа што слушнав свирење, истрели и веднаш почувствував како куршумот помина низ кожата“.
Белата куќа соопшти дека претседателот Џо Бајден добил првичен брифинг за инцидентот до 18:50 часот.
„Нема место во САД за ваков вид насилство. Болно е. Болно е“, им рече Бајден на новинарите.
Непосредно пред 22:30 часот, канцеларијата на Бајден соопшти дека тој разговарал со Трамп и дека ќе го прекине викендот за да се врати во Вашингтон.
ФБИ го идентификуваше напаѓачот како Томас Метју Крукс, 20-годишен од Бетел парк во Пенсилванија, јавуваат американските медиуми. Крукс беше именуван од ФБИ „како субјект вклучен во обидот за атентат на поранешниот претседател Доналд Трамп“.
Тајната служба соопшти дека стрелецот „испукал повеќе истрели кон бината од подигната позиција надвор од местото на митингот“ пред да биде „неутрализиран“ од агентите.
Повеќе сведоци изјавија дека го виделе напаѓачот пред пукањето и ги известиле властите.
Поддржувачот на Трамп, Рајан Најт, изјави дека го видел напаѓачот во блиската зграда.
Локалната полиција соопшти дека „одговорила на голем број извештаи за сомнителна активност“, но не даде дополнителни детали.
Напаѓачот бил вооружен со полуавтоматска пушка АР-15, пренесоа американските медиуми.
Вооружениот напаѓач и случаен минувач загинаа на митингот, додека две други лица се тешко ранети.
Двајца сведоци изјавија за американските медиуми дека виделе маж смртно застрелан во главата.