Русија е означена како земја со високи приходи во најновиот извештај на Светската банка. Бруто-националниот приход по глава на жител, како што се наведува во документот, порасна од 12.830 долари во 2022 година на 14.250 долари во 2023 година, со што Русија ја напушти групата на земји со виш среден приход и мина во највисока категорија.
Светската банка ги рангира земјите во четири групи на приходи – конкретно висок, виш среден, низок среден и низок. При пресметката на бруто-националниот приход по жител, банката го користи Атлас методот, пренесува „Комерсант“.
Банката го објасни напредокот на Русија со вложувања во одбраната и обновување на активностите во трговијата, финансискиот сектор и градежната индустрија.
„Овој чекор на Светската банка значи дека угледната глобална институција го препозна успехот на економските политики на руските власти во минатата деценија“, рече рускиот претставник во Светската банка, Роман Маршавин.