Полицијата сè уште трага по напаѓачите кои вчера наутро во скопското село Батинци со автоматски пушки пукаа кон двајца браќа, и го убија едниот од нив.
Лицата кои пукале во браќата биле маскирани, а нападот го извршиле од „мерцедес“ во движење, со германски регистарски таблички.
Возилото кое го управувале двајцата браќа било со италијански ознаки.
Второто лице кое беше сопатник во возилото се здобило со прострелна рана во рамото и е префрлено на скопските клиники.
По рафалната стрелба според очевидци, напаѓачите заминале кон село Драчевица, а регионот вчера го надлетуваше полициски хеликоптер.
Мотивите за сега не се познати, но се шпекулира дека станува збор за крвна освета за случај од пред 15-тина години кога било убиено дете, по што браќата досега се криеле во Италија.