Министерката Сања Божиновска, која е на патување во странство, за Телма пишува дека нејзиното барање за откажување од бугарското државјанство е прифатено, а сите неопходни документи предвидени во постапката биле соодветно поднесени.
„Дополнително, јас веќе ја информирав јавноста дека пасошот со кој располагав е со истечен рок на важност, а од моја страна никогаш не беше поднесено барање за негово продолжување. Ова повеќе од јасно говори за мојата одлучност да се откажам од бугарското државјанство кое, како што посочив претходно, го поседував исклучиво заради моите деловни активности на територијата на Европската Унија. Имајќи го сето ова предвид, јас навистина не би можела да наведам во биографијата дека поседувам бугарско државјанство и пасош“, пишува Божиновска која раководи со новиот владин ресор – Министерство за енергетика и рударство.
Во одговорот додава дека темата за тоа какви дополнителни државјанства поседувала станала актуелна во моментот кога најавила дека бескомпромисно ќе се бори со корупцијата и криминалот и ќе направи ревизија на сите тендери и коруптивни зделки во делот на енергетиката, чии што негативни последици паднаа врз грбот на граѓаните.