Габриела Јаковлева е назначена за нов директор на Агенцијата за разузнавање откако пред истек на мандатот е разрешен досегашниот директор Еролд Муслиу. Од кабинетот на претседателката Гордана Силјановска Давкова соопштија дека има смена и на позицијата заменик директор каде доаѓа Ивана Стојановска, а разрешена е досегашната заменичка Александра Бакреска Додовска.
Од кабинетот на Силјановска соопштуваат дека и двете назначени се професионален кадар со долгогодишен стаж и искуство во Агенцијата за разузнавање.
Според информации на Телма, новата директорка Јаковлева била дел од кабинетот на разрешениот Муслиу како помошник директор надлежна за меѓународна и меѓуинституционална соработка. Во времето на поранешниот директор Наќе Чулев била шеф на кабинетот, додека за време на двегодишниот мандат на Зоран Иванов била помошник директор за меѓународна соработка.
Заменичката Стојановска досега била на ракводна позиција во техничкиот сектор на Агенцијата за разузнавање.
Разрешениот Муслиу имаше мандат уште три години, а може да биде разрешен поради несовесно извршување на должноста или непочитување на закон. Во 2020-тата година ДКСК расправаше по анонимна претставка за Муслиу за нелегално потпишување на договор за вработување, но постапката беше прекината иако случајот беше нотиран и беше побарана реакција на надлежните.
Од кабинетот на Силјановска не соопштија зошто старата директорска двојка е разрешена.