Два гласа фалат за двотретинско мнозинство со кое треба да бидат изгласани законските измени поврзани со промените на министерствата во Владата. Мнозинството засега брои 78 пратеници, а на денешната, прва координација на новиот собраниски состав, не е постигнат договор за поддршка. ДУИ се против, а од СДСМ тврдат дека сѐ уште немаат изградено став, и покрај тоа што денеска имаа и меѓусебна координација со пратениците од коалицијата.
Двајцата пратеници од НСДП остануваат во коалицијата, со која ќе настапуваат опозициски.
Пратениците од мнозинството, пак, се оптимисти дека потребното мнозинство сепак ќе биде обезбедено.
Од овие партии најавија дека законското решение е при крај и деновиве ќе биде и официјално поднесено. Се работи за законите за организација на работата на органите на државната управа, односно преструктурирањето на одредени министерства.
Партиите работат и на формирање на собраниските комисии, а приоритетни се Законодавно-правната комисија и Комисијата за политички систем, низ кои мора да поминат овие закони.
Далиборка Демјанска Цветановска