Антикорупциската комисија ги повикува избраните функционери да ги почитуваат уставот и законите, како и изборниот законик и укажуваат дека функцијата претседател на владата и министер е неспоива со вршење други јавни функции или професии.
Уставот и законите треба подеднакво да важат за сите граѓани на државата, вклучувајќи ги и актуелните, но и претходните функционери, поради што се повикуваат лицата кои се на највисоки државни функции и вршат јавни овластувања, на обврската за почитување на начелата за законитост и интегритет, пишуваат од Антикорупциска.
Додаваат дека непочитувањето на обврските и забраните повлекува последица за престанок на мандатот на избраните функционери, согласно Законот за собранието, Законот за пратеници и Изборниот законик.
Воедно, истото претставува прекршок за кој согласно Законот за спречување на корупција и судир на интереси се изрекува прекршочна санкција.
Комисијата укажува и на законските одредби од овој закон, според кои, избрано или именувано лице за време на траењето на неговиот мандат е должно да ги почитува правилата за неспоивост на функција која ја врши, со други функции или дејности утврдени во Уставот и законите.
Антикорупциска комисија укажува и на законот за пратеници, кој исто така пропишува дека функцијата пратеник е неспоива со премиерската и министерската функција.