Соединетите Американски Држави остануваат цврсто посветени на Преспанскиот Договорот и евроинтеграцијата на Северна Македонија, порачаа претставник на Стејт департментот, по изборите одржани на 8 мај.
Ставот на претставникот на американското министерство дојде како одговор на прашање на грчките дописници во Вашингтон – дали новата претседателка го прекршила Договорот, нарекувајќи ја при заклетвата нашата земја Македонија, а не Северна Македонија, како што е нејзиното уставно име.
Катимерини, пак, известува за телефонски разговор меѓу Алексис Ципрас и Зоран Заев. Двајцата поранешни премиери на Грција и на Македонија изразија загриженост од растечкиот националистички популизам од двете страни кој го нарекоа лицемерен и опасен. Инаугурацијата на новата македонска претседателка Гордана Силјановска Давкова, која при давањето на свечената заклетва не ја изусти придавката Северна, е во фокус и на останатите грчки медиуми.
Нејзиниот потег го коментираа и низа светски медиуми. Пренесувајќи делови од заклетвата на Силјановска, Еуроактив ја нарече контроверзна инаугурацијата на новата македонска претседателка.
Попладнево се огласија и од германското Министерство за надворешни работи од каде порачаа дека Северна Македонија има обврска да го почитува Преспанскиот договор. Што се однесува до користењето на името, портпаролот на германската дипломатија рече дека Договорот од Преспа е меѓунартоден и земјата презела обврска да го почитува.
Сашко Димовски