Во говорот по инаугурацијата Силјановска три пати го спомна претседателот на ВМРО-ДПМНЕ Христијан Мицкоски за кого кажа дека го запознала во 2019-та година.
Таа посочи и дека самата не можела да замисли ваква доверба со гласови од над 560 илјади граѓани и дека се уште не може да верува во тоа, а дека единствен човек кој тврдел дека тоа ќе се случи, рече, бил Христијан Мицкоски, кој ја уверувал дека „тоа ќе се случи кога ќе има хармонија меѓу математиката и емоциите“.
-Можеби некој ќе замери што го споменав г-динот Мицкоски ама еве го пред мене и г-динот Ковачевски. Сакам и него да го споменам. И тој се одважи да ми се јави, не само на ФБ да ми посака добредојде и успешна работа туку да поразговараме. Затоа мислам дека со нас жените ќе се менувате и Вие, мажите политичари и Македонија ќе стане едно пријатно место за соживот на сите, истакна Силјановска во делот од говорот каде зборуваше за единство и еднаквост на сите.
Лидерот на ДУИ Али Ахмети кој исто така беше во салата не беше споменат по што партискиот портпарол Арбер Адеми изјави дека таа во говорот не спомнала никој освен двајца политичари.
Во говорот не беше споменат ниту досегашниот претседател Стево Пендаровски, но тој се среќава со Силјановска при примопредавање на функцијата во Вилата Водно.