На приемот за честитање на новата претседателка Гордана Силјановска имаше голем ред за честитки. Меѓу нив беше и познато лице од дипломатијата но, и од истрагите на СЈО.
Со прегратка и пригодни зборови, Силјановска доби честитка од Срѓан Керим.
Керим беше министер за надворешни работи, македонски амбасадор во Обединетите Нации и во Германија имаше и меѓународна кариера кога во 2017-та беше избран за претседател на 62-то Заседание на Генералното собрание на ОН, а неуспешно се кандидираше и за генерален секретар на Обединетите Нации, највисоката функција во светската организација.
Контроверзноста ја заработи по соработката со Сашо Мијалков и со Орце Камчев при преземањето на групацијата весници и печатени медиуми во МПМ што заврши со стечај на фирмата и откази и долгови за медиумските работници и новинари.
Поради стечајот на МПМ, Специјалното Јавно Обвинителство отвори истрага во која го повикуваше и последниот директор на фирмата Срѓан Керим. Тој еднаш беше на распит, а потоа на останатите покани не се јавуваше туку престојуваше во Хрватска.
Керим имаше обид и да се избори за претседателска кандидатура во Македонија, но не успеа. 75-годишниот дипломат денеска се појави и на приемот во Собранието за честитање на Силјановска, а исто така беше и во вилата Водно на прославата на инаугурацијата на новиот Претседател.