Секторот за меѓународна полициска соработка при МВР е известен дека турските власти ја одобрија екстрадицијата на Љупчо Палевски Палчо, кој е осомничен за убиствата на 14-годишната Вања Ѓорчевска и пензионерот Панче Жежовски.
-Секторот за меѓународна полициска соработка при МВР е известен дека се завршени потребните процедури во врска со овој случај и во координација со турската полиција се преземаат мерки за организација на преземањето на лицето и негова екстрадиција во Република Северна Македонија, одговорија од МВР.
Палевски е осомничен за две грабнувања и за две убиства кои се случија на крајот на ноември и кои поради монструозната ликвидација на ученичката Вања ја згрозија јавноста во Македонија. Покрај Палевски, осомничени се уште 4 лица меѓу кои и таткото на Вања, Александар Ѓорчевски.
Палевски беше во бегство од почетокот на истрагата и беше уапсен во Турција по меѓународна потерница. Веќе 5 месеци е во есктрадициски притвор, а засега нема точна информација кога ќе биде преземен и префрлен во Македонија.
По пристигнувањето, Палевски ќе биде однесен директно во затворот Шутка бидејќи за него веќе има определена мерка од 30 дена притвор.