Собранието, на итна седница, ги изгласа измените на законот за автопатот Кичево – Охрид, со кој рокот на изградба се продолжува за уште три години, односно до крајот на 2026 година. Со досегашните анекси, рокот на завршување беше до Нова година. Не се предвидуваат дополнителни пари за изградба, цената останува 598 милиони евра.
Владата претходно соопшти дека е неопходно продолжување на рокот поради појавата на нови свлечишта. Делници од патот во рамничарскиот дел на трасата треба да завршат порано, бидејќи се речиси готови и нема ризик од свлечишта.
За делот од Кичево до тунелите кај Пресека ќе треба повеќе време, а делот по тунелите кон Охрид треба да биде пуштен во употреба веќе идното лето, освен делот од Песочани до Требеништа кој треба да се гради до октомври 2026 година.
Автопатот Кичево-Охрид почна да се гради пред 10 години. Требаше да чини 375 милиони евра и да заврши во 2018 година. Со анекси на договорот, рокот за изградба пет пати се продолжуваше, а цената растеше.
