Слики, скулптури, таписерии и графики го сочинуваат третиот дел од изложбата „ Париски рефлексии“, отворена во Чифте амам при Националната галерија на Македонија. По изложените прв и втор дел од изложбата во 2022 и 2023 година на истото место, во овој дел „ Париските рефлексии“ го прикажуваат творештвото на третата генерација македонски визуелни уметници, родени по 1930 година. Тие престојувале во Париз , во атељето Cite internasional des arts , како добитници на поранешната државна награда „ Моша Пијаде“, преку специлизации, дополнителна наобразба и отворање изложби, со што биле поврзани со центарот на светската уметност. Со тие искуства влијаеле на развојот на македонската современа визуелна сцена во 7 и 8 деценија на 20 век, а значајни се и по нивната петагошка работа, кажа директорката на Националната галерија.
- Секој со своето препознатливо творечко кредо извршиле влијание врз развојот на македонската уметност. Особено во доменот на пренесувањето и продлабочувањето на влијанијата на енформелот, надреализмот, новата фигурација, геометризмот и останатите тогашни светски тенденции, кажа Дита Старова Ќерими, директорка на Националната галерија на Македонија.
Од делата на Нове Франговски и Душан Перчинков, преку Ана Темкова и Глигор Чемерски до Боро Митриќески и Васил Василев, изложбата ја рефлектира испреплетеноста на македонската и француската култура, кажа амбасадор на Република Франција во Македонија. Со неа, Националната галерија се вклучи во чествувањето на Меѓународниот ден на франкофонијата.
- Оваа нова изложба ни овозможува одново да ја процениме таа испреплетеност на нашите две култури. Тие рефлексии на париските движења во македонското модерно сликарство , преку една фина селекција од 40 дела од 23 македонски уметници, кажа Сирил Бомгартнер, амбасадор на Република Франција во Македонија.
Куратор на изложбата е Маја Чанкуловска – Михајловска. Таа за посетителите ќе биде отворена до 20 април. А, како што првите два дела од „ Париските рефлексии“ беа изложени пред битолската публика минатата година, така годинава и третиот дел ќе патува за Битола. Изложбата е организирана во соработка со Францускиот институт во Скопје и Француската амбасада во Македонија.
Сотир Трајков
