Европскиот сојуз за промени го прекинува бојкотот на собраниската работа. Шестмината пратеници на БЕСА, Алтернатива и Демократко движење повторно ќе учествуваат во работата на собраниските тела. Ова го потврдува пратеникот Фадиљ Зендели, со објаснување дека закажувањето пленарна седница за избор на член на ДИК е основа за прекин на бојкотот.
Договорот е направен на утринската координација кај спикерот Јован Митрески. Тој побарал од партиите потврда за обезбедување дво-третинско мнозинство, кое е неопходно за избор на член на ДИК. Терминот 28 февруари е утврден како краен рок за оваа точка. Можно е да биде разгледувана и порано, уште оваа недела, доколку дел од пратениците се вратат од службен пат и доколку се обезбеди кворум.
Опозициската коалиција го предлага Абдуш Демири. Минатата недела, на Комисијата за избори и именувања, тој беше утврден како единствен кандидат. По двомесечен застој, вториот кандидат, Зулфи Адили од Алијанса, се повлече и беше именуван за директор на Агенцијата за странски инвестиции.
ДИК работи во некомплетен состав цела година, по изборот на Кренар Лога за министер. Подготовките за избори се интензивираат, а шестмината членови ги утврдија календарите на изборните дејствија. Седмиот член треба да се избере со најмалку 80 пратеници по предлог на опозициските партии.