Над 900 воспитувачки, негователки и кандидати за директори низ градинките во земјава, речиси, четири години чекаат да полагаат за лиценци со кои ќе можат да се вработат во овие установи, откри денеска техничкиот министер за труд и социјална политика, Ѓоко Велковски. Комисијата за лиценци може само да ги продолжува лиценците, а договорот со операторот којшто го врши лиценцирањето завршил и досега не е распишан повик за избор на нов.
Во штипските детски градинки има недостаток на кадар, а испразнети се околу 60 работни места за негователки и воспитувачки. Поради немањето на кадар, голем дел од децата не можат да се згрижат и се на листа на чекање за прием.
Техничкиот министер Велковски денеска од Штип најави дека наскоро ќе имаат и решение за негователките и воспитувачките во струшките градинки, кои протестираа, поради нерешениот статус, но и паричниот надоместок од само 10.000 денари.
Викторија Јованова
