Според тоа од кого се бараше поддршка и од кого ја добија за членот во ДИК, Европската демократска партија која се декларира како опозиција, како да е со една нога во власта. На ова прашање во вечерашната Топ Тема на Телма Аријанит Хоџа, претседател на Европската демократска партија, рече дека тие се релативно нова политичка партија и случувањата на политичката сцена се такви што некогаш треба да се донесат одредени решенија.
- Конкурсот за изборот на членови на ДИК настана кога ние се уште бевме во фаза на регистрирање на партијата, па ние немавме удел кој аплицирал и како се одвивала постапката. Од правен аспект кога ги завршивме сите наши процедури за регистрација на партијата го информиравме Собранието дека настапуваме со пратеникот Басрим Бајрами и дека сме опозициона партија. Врз основа на тоа што го процениле работните тела во собранието, пратено е известување за тоа кој конкурирал во ДИК за да го надополни местото и ние требаше да кажеме за кого ќе дадеме поддршка, бидејќи тоа е според процедурата која можеби за првпат се применува, рече Аријанит Хоџа, претседател на Европската демократска партија.
Доколку се следел Законот и членот 27 и став 5 многупати до сега би требало да биде сменет составот на ДИК бидејќи секоја партија кога влегувала и излегувала имала обврска да го известува претседателот на Собранието. Но тоа предизвика напуштање на Собранието од страна на Европскиот сојуз за промени кои за себе велат дека тие се вистинската опозиција.
- Не станува збор за емотивно прашање кој како се чувствува и како би се определил. Изборниот законик остава многу простор за толкување во ситуацијата каде што се наоѓаме. Доколку би биле две албански партии едната на власт другата во опозиција, многу јасно стои како би се одвивале процедурите во контекст на тоа како би се избирал членот на ДУИ. Тоа што се бара законски е членот на ДИК да не биде во раководните структури на партијата, за тоа секој кандидат дава изјава. До моментот кога јас сум предлагал член на ДИК не сум имал никакво барање од Европскиот сојуз за промени за да седнеме и да се договориме за тоа кој би бил, рече Аријанит Хоџа, претседател на Европската демократска партија.