Леброн Џејмс постигна највисоки 40 поени сезонава и ги предводеше Лос Анџелес лејкерс до победа од 129-120 на гостувањето кај Оклахома, во рамки на НБА-лигата.
Лејкерс ја прекинаа лошата серија од четири порази по ред, а Џејмс имаше одлична шутерска вечер од далечина, бидејќи постигна пет тројки од исто толку обиди. Ентони Дејвис запиша 26 поени и 11 скока. Шаи Гилгеус Александер беше најефикасен во редовите на Тандер со 34 поени.
Далас го совлада Сан Антонио со 114-119, а Лука Дончиќ го запиша 36-тиот трипл-дабл во кариерата со 30 или повеќе поени. Словенецот го заврши натпреварот со 39 поени, 12 скока и 10 асистенции.
Денвер дојде до гостински триумф кај Шарлот од 102-95. Мајкл Портер Јуниор имаше 22 поени, а Никола Јокиќ запиша 18 поени, 10 скока и 9 асистенции.
Детроит го запиша 26-тиот пораз во низа откако загуби на гостувањето кај Бруклин со 126-115 и го израмни негативниот рекорд во НБА-лигата со Кливленд и Филаделфија.
Бостон славеше во Лос Анџелес кај Клиперс со 145-108, како и Милвоки кај Њујорк со 130-111. Победи остварија и Голден Стејт, Минесота, Кливленд и Јута.