Американскиот спринтер Ноа Лајлс и Кенијката, Фејт Кипјегон ги добија признанијата за најдобри атлетичари во годината што изминува.
Лајлс блескаше на последниот Светски шампионат во Будимпешта каде успеа да освои три златни медали. Покрај триумфот во штафетата 4 пати по 100 метри, Лајлс беше најуспешен на 100 и 200 метри.
Кај дамите доминацијата во текот на сезоната Кипјегон ја круниса со престижното признание. Атлетичарката од Кенија поставуваше нови светски рекорди на 1500, 5000 метри и една милја, а на шампионатот во унгарската престолнина таа се закити со златото во првите две дисциплини.
Посебни признанија за постигнувањата во текот на годината добија Арман Дуплантис и Јулимар Рохас. Швеѓанецот на митингот во Јуџин постави нов светски рекорд прескокнувајќи 6 метри и 23 сантиметри додека Рохас во Будимпешта по четврти пат освои мундијалско злато во трискок.
Тигист Асефа од Етиопија и Кениецот, Келвин Киптум добија признание за постигнати резултати надвор од атлетските стадиони. Асефа на женскиот маратон во Берлин постави нов светски рекорд кај дамите додека Киптум забележа најдобар резултат на сите времиња на маратонот во Чикаго.
ФОТО: Игор Паневски