Училишниот двор во Песталоци денес беше мирен и тивок. Децата беа на редовна настава. Повремено можеше да се забележат ученици како влегуваат и изглегуваат од часови.
Во ова училиште учеше Вања, тинејџерката која беше киднапирана и убиена.
Оттогаш, учениците од ова училиште и нивните родители живеат во страв. Надвор од училишниот двор на училиштето, можеше да се забележат роднини на учениците кои ги чекаат да завршат часовите и да ги однесат дома. Пред камерата велат дека стравуваат за животот на нивните најмили.
„ Дојдов денеска ова време, а и вчера исто така да си ја земам внукичката од школо. Таа е тука седмо одделение и ми вика дедо те молам дојди да ме земеш. И велам ќе дојдам сине ќе те земам, што да правам, ние пензионерите за тоа сме, за внуците живееме. Па исплашена е поради случајот и доаѓам да ја земам, до кога ќе биде тоа вака не знам“, вели Миладин Димовски, дедо на ученичка во ООУ „Јохан Хајнрих Песталоци“.
Родители и граѓани и денеска носеа цвеќе и се простуваа од Вања. Преполната маса со последни поздрави е веднаш до училишната врата на влезот.
Тамара Марковска