Четиринаесет и пол милијарди долари за Израел, но не и за Украина. Долниот Претставнички дом на американскиот Конгрес, со поддршка на опозициските Републиканци, одобри пакет воена помош за блискоисточната земја, како помош во војната против Хамас. Законот, кој беше донесен со 226 гласа „за“ и 196 „против“, веднаш беше протолкуван како предизвик за Демократите и претседателот Џо Бајден кој најави вето.
Изгласаните средства се прв значаен чекор во Конгресот за поддршка на Израелците во борбите со палестинската милитантна организација, но, сепак, е далеку помал од целокупното барање на Бајден од 106 милијарди долари за поддршка и на Украина во војната со Русија, за напорите на САД да се спротивстават на Кина и за зголемување на безбедноста на границата со Мексико.
Државниот секретар на САД, Ентони Блинкен присттигна во трета посета на Израел од 7 октомври и нападот на Хамас, на што Израелците одговорија со офанзива на одмазда кон палестинската територија. Во фокусот на разговорите со неговите израелски домаќини ќе бидат мерки за намалување на цивилните жртви во Појасот Газа.
Обединетите нации упатија апел за итна помош од 1,2 милијарди долари за околу два милиона и 700.000 луѓе во Газа и на Западниот брег.
Во меѓувреме се огласи и иранскиот врховен водач, Ајатолахот Али Хамнеи кој порача дека израелската влада го лаже својот народ, кога изразува загриженост поради заложниците кои ги држи Хамас, додека истовремено гранатира подрачја во кои би можеле да бидат. Тој додаде дека Израел би бил замолчен за неколку дена, доколку ја нема американската поддршка.
Медиумите јавуваат дека и денеска продолжуваат силните воздушни напади на израелските сили, како поддршка на пешадиските единици на терен кои, според израелски официјални лица, ја опколуваат Газа. „Би-Би-Си“ објави дека борби се водат во пет различни области во енклавата, но и во западниот дел каде е направен најголем продор. Израелските сили објавија дека во последните воздушни напади е убиен и командант на баталјон на Хамас, а во текот на ноќта паднале проектили во близина на болницата Ел Кудс во која се засолнети околу 14.000 луѓе.
Сашко Димовски