Драги Рашковски чека да се официјализира неговото излегување од домашен притвор со кауција. Судот му го укина притворот, откако поранешниот генерален секретар на владата понуди гаранција од 193 илјади евра во недвижен имот дека нема да бега.
Обвинителството се жали на таа одлука, па сега треба да пресече скопска Апелација. Се чека и понудениот имот како гаранција да се прибележи во Катастарот за недвижности.
Во јули годинава, Рашковски првостепено беше осуден на 8 години затвор за злоупотреба на службената положба и за перење пари. Од тогаш е во домашен притвор. Заедно со него беа осудени уште шест луѓе. Рашковски и уште тројца осудени се задолжени да ја надоместат штетата што ја направиле врз буџетот од околу 190 илјади евра. Тој се жалеше на пресудата, па сега случајот е пред Апелациониот суд.
Рашковски беше осуден дека како генерален секретар на владата нелегално набавил софтвери за сообраќајни прекршоци од фирмата Инвока груп, кои со месеци не се користеле од Министерството за внатрешни работи. Исто така беше осуден и за набавка на метални кабини за системот за биометриска идентификација. Според судот, осудените си префрлале пари меѓу себе, а дел од парите му префрлале на Рашковски.
Дел од обвинението се однесуваше и за исплата на хонорари на луѓе ангажирани од Рашковски, а дел од парите завршувале кај него.
Рашковски во април 2021 беше однесен во притвор во Шутка, но по два месеци беше пуштен да се брани од слобода со гаранција од 500 илјади евра.
Срѓан Стојанчов