Израелските власти денеска и официјално прогласија војна против палестинската милитантна група Хамас. Обемот на израелски одговор што ќе следува не е јасен, но се шпекулира дека Израел би можел да се обиде да преземе целосна контрола над појасот Газа за првпат по 2005 година. Израелскиот министер за одбрана Јоав Галант порача дека Палестинците ќе платат висока цена за операцијата што ја започнаа.
Попладнево се огласи и Хамас. Портпаролот на палестинската екстремистичка група, Хазем Касем порача дека нема простор за разговори за примирје, сè додека Израел напаѓа цивили. За тензиите на Блискиот исток ги обвини властите во Ерусалим и нагласи оти е прерано да се зборува за медијација, бидејќи ситуацијата на теренот отсликува кој ја има контролата.
Израелската војска, паралелно со „чистење на теренот“ од милитантни во јужниот дел на земјата и околу појасот Газа, спроведува и операција за евакуација на населението, но и спасување на лица од заложништво на Хамас. Едно такво е веќе објавено од израелските сили на кое се гледаат неколку спасени лица.
Соединетите Американски Држави најавија дека ќе преместат ударна група на носачи на авиони со околу 5.500 војници поблиску до Израел. Британскиот премиер Риши Сунак вети целосна поддршка за Израел во борбите со Хамас. Идентични пораки за израелскиот министер Бенјамин Нетанјаху испрати и германскиот канцелар, Олаф Шолц додека во земјата се преземени зголемени мерки за заштита на израелски објекти.
Според властите во Ерусалим, над 600 луѓе се убиени во Израел од нападите на Хамас вчераутро. Палестинското министерство за здравство, пак, објави дека најмалку 370 луѓе загинаа и над 2.200 се повредени во израелските напади врз појасот Газа.
Сашко Димовски