Предлог Законот за амнестија по усогласувањето со надлежните институции оди во собраниска процедура. Со законот се предвидува намалување на казните за оние кои сториле полесни кривични дела. Владата на претходната седница го разгледуваше предлог законот, а од казна затвор се предвидува да бидат ослободени, осудените до шест месеци, а останатите ќе добијат намалување на казната од 30 отсто. Усогласувањето со секторот за законодавство, како што рече премиерот Димитар Ковачевски, меѓудругото и за третманот на осуденици во странство е завршен.
Во наредните два дена министерот за правда ќе има детален брифинг со претставниците на медиумите за овој закон кој истовремено ќе биде доставен до Собранието, рече премиерот Димитар Ковачевски.
Амнестијата не се однесува на лицата кои делата кои се предмет на амнестија, ги сториле по 1 септември 2023 година. Од вкупно 2114 затвореници, целосна амнестија ќе добијат 286 од нив, а делумна амнестија 996 затвореници. Од Министерството за правда соопштија дека нема амнестија за тешки кривични дела, како убиство и кривични дела против државата, изборите, разбојништво, половата слобода, семејно насилство и родово -базирано насилство. Изоставени се и делата кои беа предмет на измени на Кривичниот законик.
Целта е да се овозможи ресоцијализација на сторителите на кривични дела и растеретување во казнено поправните установи со оглед на фактот што состојбата таму во изминатиот период е алармантна, а тоа беше потенцирано во бројни меѓународни извештаи како и од Комитетот против тортура во рамките на Советот на Европа, соопштија од Министерството за правда.
ВМРО-ДПМНЕ најави дека ќе го блокира законот со сите демократски алатки што ги има на располагање. Годинава амнестирани беа лицата кои не ги плаќаа казните за време на ковид пандемијата.
Марија Митевска
