Со лопати и со механизација, македонските војници директно се соочуваат и ги отстрануваат големите наноси по поплавите во Словенија. Стационирани се и помагаат во реонот на Општина Межица. Првиот ден кога пристигнале, припадниците на АРМ биле сместени и заедно со локалните жители почнале да работат на расчистување, сведочи во аудио изјава за Телма, потпоручник од батаљонот во Штип.
Ова е понтонскиот мост, кој македонските војници заедно со словенечките инжинерци и жители на Межице го направија и го пуштија во употреба пред два дена. За жителите е олеснување во секојдневниот живот прекинат со тешките поплави. Во гратчето денеска, војниците на АРМ беа посетени од словенечката министерка Дух, која е со македонско потекло.
По катастрофалните поплави во Словенија, Армијата во рамки на помошта во Словенија испрати 100 војници.
Во Словенија се наоѓаат 100 припадници на АРМ кои помагаат во санирањето на штетите што ги предизвикаа поплавите, како последица на поројните дождови во првата недела од месецов. Помошта беше побарана од страна на Словенија преку механизам на НАТО.
Припадниците на Армијата на Република Северна Македонија, согласно владината одлука, ќе останат во Словенија 30 дена.
Во најлошите поплави што ја зафатија Словенија од нејзината независност во 1991 година, загинаа шест лица, а беше предизвикана штета која се проценува на неколку милијарди евра.
Сашко Димовски