Маркета Вондрушова приреди изненадување на Вимблдон и ја освои титулата во женска конкуренција по победата во два сета над фаворитката Онс Жабер. За тенисерката од Чешка ова е прва грен слем титула во кариерата, а Тунижанката втора година по ред губи во финалето на овој турнир.
Вондрушова пред само една година на Вимблдон беше туристка и ги гледаше мечевите од трибините поради повреда, но денеска го крена пехарот по триумфот од 6-4 и 6-4 против Жабер. Тунижанката подобро го почна мечот и поведе со 2-4 во првиот сет, но Вондрушова врза четири гема по ред за да го добие сетот. Во вториот сет ја заокружи победата со истиот резултат.
Чешката тенисерка, која се наоѓа на 42-то место на ВТА-листата стана првата неносителка што го освоила Вимблдон во Опен ерата и втора по Били Џин Кинг во 1963 година. Жабер го доживеа третиот пораз во третото грен слем финале, откако лани загуби од Елена Рибакина на Вимблдон и од Ига Швјонтек на Ју Ес Опен.
Утре на програмата е машкото финале на Вимблдон помеѓу Новак Ѓоковиќ и Карлос Алкараз, што се игра од 15 часот.
