Американскиот претседател Џо Бајден порача дека основачот на руската приватна воена компанија „Вагнер“, Евгениј Пригожин можеби е во животна опасност по минатомесечниот бунт во Русија.
„Би бил внимателен што јадам. Би обрнал внимание на менито“, рече Бајден на прес-конференција во Хелсинки.
„Блумберг“ наведува дека шегата на Бајден алудира на, како што се истакнува, „руските безбедносни служби кои користат нервни агенси и полониум за ликвидирање на политичките противници на Владимир Путин“.
Американскиот претседател од Хелсинки рече дека и лидерите на Самитот на НАТО во Вилнус разговарале оти не знаат каде точно се наоѓа Пригожин во моментот. Но, и за тоа дека бунтот би можел да влијае врз руските операции во Украина и иднината на „Вагнер“.
Пригожин по бунтот на 24 јуни замина во Белорусија, меѓутоа Кремљ оваа недела објави дека пет дена подоцна Путин одржал тричасовен состанок со лидерот на „Вагнер“ и останатите команданти на групата.