Русија и Белорусија го потпишаа договорот за распоредување на руското тактичко нуклеарно оружје на белоруска територија. Документот го потпишаа министрите за одбрана на двете земји, објави руската државна агенција ТАСС.
„Ројтерс“ пренесува дека рускиот министер за одбрана рекол оти Западот води „необјавена војна“ против Русија и Белорусија.
Русија и Белорусија, кои се блиски сојузници во војната во Украина, претходно оваа година се согласија за распоредување на дел од рускиот тактички нуклеарен потенцијал во Белорусија.
Министерот за одбрана на Белорусија, Виктор Хрењин истакна дека распоредувањето на нестратешко нуклеарно вооружување во Белорусија претставува одговор на агресивната политика на непријателските земји.
Според него, во рамки на воената и воено-техничката соработка на земјите се преземени мерки за засилување на борбениот потенцијал на регионална група на сили, вклучувајќи и нивно опремување со ново, современо вооружување, како што се оперативни тактички ракетни системи „Искандер-М“ и противвоздушни ракетни системи С-400. Исто така се преработени и авиони од типот Су-25, со можност за примена на нуклеарно воздушно вооружување.