Во Германија во тек е штрајкот на десетлетието. Сопрени се возовите, авионските летови во Минхен и Франкфурт, метроата не работат. Железничкиот и транспортниот синдикат „ЕВГ“ и синдикатот на јавниот сектор „Верди“ повикаа на предупредувачки мега штрајк кој ќе трае 24 часа..Им се придружија работниците од водниот и копнениот транспорт, а основното барање е повисока плата.
- Бараме 10,5 отсто, најмалку 500 евра..И оваа минимална сума е исто така особено важна за нас. Бидејќи токму групите со пониски и средни приходи се несразмерно тешко погодени од инфлацијата, изјави Волкер Гејер, заменик федерален претседател на Синдикатот ВЕРДИ
Работодавачите – главно државните и компаниите од јавниот сектор – досега ги одбиваа барањата, наместо тоа нудеа зголемување од пет отсто со две еднократни исплати од 1 000 и 1 500 евра, оваа и следната година. Но, синдикатите ги одбија овие понуди.
Возовите не сообраќаат речиси воопшто денеска, а од аеродромите работи само Берлинскиот. Градскиот превоз е сопрен во седум од 16-те провинции. Луѓето денеска се одлучија да ги запалат автомобилите што предизвика невиден хаос на улиците. Погодени се стотици илјади патници кои ја користат железницата.
- Милиони патници кои зависат од автобуси и возови страдаат поради овој прекумерен и презаситен штрајк. Не секој може да работи од својата домашна канцеларија. Илјадници компании во економијата кои вообичаено ги примаат или испраќаат своите стоки со железница, исто така страдаат. Да, и заштитата на животната средина и климата, исто така, на крајот страда, порача Ахим Штраус, портпарол на германска железница „Дојче Бан“
Денешниот штрајк ги испразни метро станиците, и го парализираше секојдневното функционрање. Луѓето ги разбираат барањата на синдикатите, и над 50% ги поддржуваат, но укажуваат дека доцнењето ги засега и нив.
- Во моментов, искрено можев да плачам затоа што сум ужасно вознемирен поради тоа. Мислам, го разбирам ова. И добро е да се штрајкува, но навистина имам многу лоша среќа во последно време поради штрајковите. И, се разбира, тоа навистина е лошо, вели Роња Мартини, студентка.
Иако станува збор само за 24-часовен штрајк, хаосот во сообраќајот ќе трае уште неколку дена. И Германија се бори со висока инфлација, која е речиси 9%, откако руската инвазија на Украина ги зголеми трошоците за храна и енергија. Работодавците ги обвинуваат синдикатите дека со нивните барања ја потхрануваат инфлацијата. Синдикатите негираат и велат дека повеќе не можат да го поднесат товарот на зголемените трошоци за живот.
Алиса Шутиноска