Во однос на дилемите дали на листата на функционери кои би биле опфатени со санкции од САД, би можеле да се најдат и некои судии и адвокати, денеска своите ставови ги споделија поранешниот судија Владимир Туфегџиќ и адвокатот Виктор Цветковски.
„Повеќе пати сум кажал дека ние прво треба да детектираме три работи. Дали е проблем едукативниот процес во академијата за судии и јавни обвинители, бидејќи од таму се регрутираат судиите и обвинителите. Дали е проблем неиздначената судска пракса која е евидентна. За исти правни работи имаме различни ставови и мислења или е проблематична нестручноста и непрофесионалноста на судиите. Не би се оптеретувал многу со црните листи, бидејќи тие имаат политичка димензија. Ние и досега имавме црна листа, па не гледам дека на тие лица нешто им фали.“ –изјави Туфегџиќ.
Цветковски изјави дека не очекува дека од правосудните органи ќе има лица на американската црна листа, оценувајќи дека на долгорочен план на државата и е потребна деполитизација на судството.
„Ние имаме сега одлив на судии. Куманово имаше еден период. Сега нема судии во Прилеп и така натаму. И во други судови. Доаѓаме во ситуација да имаме нов избор на кадри во едно одделение. За да имаме континуирана едукација, не ни треба политички притисок. Има и професионалци во судовите но и луѓе кои реагираат на секаков вид притисок.“ – вели Цветковски.
