Британскиот премиер Борис Џонсон се извини денеска од говорницата во парламентот откако заврши истрагата која потврди дека забавите организирани во текот на локдаунот во неговата резиденција на Даунинг Стрит бр 10 претставуваат сериозен неуспех да се исполнат стандардите кои се очекуваат од владата.
Џонсон им кажа на законодавците во долниот дом на парламентот дека ќе направи промени во начинот на кој функционира владата по обелоденувањето на скандалот “Партигејт”.
Обраќањето на Џонсон следува откако втората постојана секретарка во кабинетот, јавна службеничка, Сју Греј го објави својот извештај во кој тврди дека собирите на кои присуствувале Премиерот и членовите на неговиот кабитнет во период кога граѓаните на Британија беа под строг локдаун, претставуваат “огромен неуспех” да бидат запазени стандарите за добро владеење кои се очекуваат од владата.
Извештајот на Греј се однесува на 4 собири во 2020-тата и 2021-та година а полицијата спроведува истрага за уште 12-тина настани.
Во извештајот Греј заклучува дека “неуспехот на лидерството и нивните одлуки” овозможиле настани кои воопшто не требало да се случат.
Иако се извини, Џонсон подвлече дека на неговата влада може да и се верува дека ќе работи во интерес на граѓани, отфрлајќи ги барањата на опозицијата и на дел од пратениците од неговата конзервативна партија, да поднесе оставка.