- Рашковски: „Парите ми се стекнати пред да станам функционер, а на децата им штедев од родендени и мекици“
Најави интересно судење режирано како во Холивуд. Иноватор, универзитетски професор, поранешен генсек, а сега обвинет седна во судницата за прв пат.
Драги Рашковски се гони дека ја злоупотребил службената положба и перел пари или со зборови на обвинителството се вмешал во 4 јавни набавки околу техничката спецификација, давал хонорари на блиски луѓе и отплаќал кредити.
Го зголемил својот имот, но и имотот на своите две малолетни деца. Иако се одложи првото рочиште, Рашковски пред медиумите се огради дека парите, нивата, плацот и готовината се негови пред да стане функционер, а на децата им штедел подароци од прославите.
“Вооружена“ со докази во судницата пристигна и обвинителката Ивана Трајчева. Ќе го одбрани обвинението против Рашковски и ќе ја докаже неговата и вината на уште 6-мина обвинети.
Барал, но не пронашол во гинисовата книга на рекорди запис како можат да се создадат толку пишани пораки за кусо време, реагира Рашковски за материјалните докази на обвинителството.
Рашковски тврди дека и во делот на отплаќање кредити обвинителството греши бидејќи тој префрал пари на кредитните картички од средства од рефундирање од службените патувања на кои често трошел лични средства.
Плац купил во скопско Побжје со кредит, но терминот Хациенда не му е познат. Наспроти реакциите на Рашковски, обвинителството дополнително го товари дека склучувал авторски договори со физички лица, кои не ги извршувале работните обврски, а им биле исплаќани месечни хонорари.
Тие ги подигнувале парите и дел му враќале на Рашковски. Со тоа е направена штета на буџетот во вкупен износ од 1.300.000 денари.
Павле Беловски