Има ли шема за кешот од кладилниците да се „пере“ со помош на кражба на лични податоци.
Милион и 60 илјади денари или околу 20 илјади евра биле откриени во годишната пријава за 2018-та кај сопругот на екс министерката Елизабета Канческа Милеска. Но таа овие пари не ги пријавила во антикорупциската комисија која ги проверувала имотните состојби на поранешните функционери. Кога ја прашале зошто, одговорот бил дека таква добивка нема.
Но ова не е прв пат да се открие дека некој ги употребил податоците од личните карти кои се даваат во кладилниците или казината при исплата на добивка, поради тоа што добитникот плаќа данок на тие пари. Но за ДКСК ова веќе станува сериозно и од таму повикаа обвинителството да отвори истрага за можно перење на пари.
Истрага веќе отворила Управата за финансиско разузнавање и ветила дека ќе го извести и обвинителството. Од ДКСК пак апелираа доколку граѓаните забележат сомнителна исплата на данок од игри на среќа во нивните даночни пријави веднаш да пријават во обвинителствата.
Билјана Николовска