МЗТ Скопје стигна до четвртата победа на петиот натпревар сезонава во АБА2-лигата откако денеска на првиот натпревар на турнирот во Сараево го совлада Хелиос Домжале со 94-88.
Избраниците на тренерот Дарко Радуловиќ одиграа феноменално полувреме во кое негативата од -10 поени ја претворија во важен триумф.
Во првиот дел МЗТ беше постојано во негатива, а на полувремето резултатот гласеше 35-45 за словенечкиот состав. На „металците“ им тргна шутот за три поени, а во главна улога беше Адем Мекиќ, кој постигна шест тројки и беше еден од главните во пресвртот.
Клучна беше серијата од 13-0 на нашиот шампион на крајот на третата и почетокот на четвртата четвртина. Предноста потоа достигна и +10, па МЗТ не дозволи Домжале да се врати во игра за конечен триумф од 94-88.
Дастин Вер со 23 поени и 13 асистенции беше предводник на нападот на МЗТ, Роберт Рикиќ имаше 21 поен, додека Адем Мекиќ реализираше 20 поени, сите во второто полувреме.
На следниот натпревар што се игра задутре МЗТ се среќава со домаќинот на турнирот Спарс Сараево. Нашиот тим се наоѓа на 2.место на табелата со 9 бодови, еден помалку од лидерот Борац.