Бројот на новозаразени од КОВИД-19 во државата се намалува. Во изминатите седум дена регистрирани се 2.090 нови позитивни случаи што е за 8,1% помалку во однос на минатата недела. Од новозаболените најголем дел се од Скопје, додека пак највисока неделна инциденца е регистрирана во Кавадарци.
Намалување има и во црниот биланс на починати лица, каде што во изминатата недела регистриани биле 66 смртни случаи што е за 2,9% помалку во однос на претходната недела.
Во последните 14 дена забележително е намалувањето на инциденцата во 27 градови во државата. Највисока инциденца е регистрирана во Кавадарци, Скопје и Неготино, а најниска во Македонски Брод.
Според извештајот на Министерството за здравство најголемиот број на заболени биле на возраст над 60 години, додека највисок специфичен морбидитет е регистриран кај возрасната група од 50 до 59 години.
Во моментов во државата хоспитализирани се вкупно 427 лица што е за 7,4% помалку во однос на минатата недела. Од нив, 247 се на кислородна поддршка што е за 8,3% повеќе во споредба со минатата недела, додека пак 13 пациенти се на инвазивна/неинвазивна механичка вентилација.
Од почетокот на пандемијата до денес во државата регистрирани се 7.740 смртни случаи, најголем дел од нив на возраст над 60 години. Кај 76% од починатите регистрирани се коморбидитети, најчесто дијабет и кардиоваскуларни и белодробни заболувања. Од смртните случаи дури 93,2% биле во болнички услови, а 6,8% починале дома.
Репродукцискиот број на заразени од ковид во Македонија изнесува 0,90 што според индикаторите на СЗО за можноста за понатамошна трансмисија и капацитетите за одговор на земјата се проценува дека државата е во фаза на широка трансмисија, подниво 2, со умерени капацитети за одговор.
Мартин Николовски