Почетокот на јули донесе термини за вакцинација на вработените во образованието.
Генерално, расположението помеѓу нив е дека наставата со физичко присуство на учениците е незаменлива и дека така треба да започне новата учебна година во септември. Здравствените власти се на иста линија по ова прашање, а епидемиолошката состојба е стабилна, па затоа сега се кројат плановите како побезбедно да се спроведе наставата.
Од понеделник ќе се почне со вакцинација на кадарот.
„Овој процес на имунизација на наставниот и ненаставен кадар вработен во образованието го спроведуваме за реализација на воспитно-образовниот процес со физичко присуство на учениците во учебната 2021/2022 година. Следната недела ќе започне закажувањето термини за вакцинација и на вработените во високо образовните институции“ велат од Министерството за здравство.
Дел од синдикатите со реакција. Од Независниот синдикат за образование и наука ја поздравуваат одлуката да се обезбеди вакцина за сите наставници и други вработени во училиштата коишто сакаат.
Но, предупредуваат дека има наставници коишто одбиваат да примат вакцина и дека тоа е нивен личен став – што никако не смее да се одрази на спроведувањето на наставата со физичко присуство, вели претседателот на синдикатот Томислав Гиевски.
„Не постои механизам со кој просветните работници би се ставиле во положба со сила да примат вакцина – тоа не би било уставно и ние не би дозволиле такво нешто. Дискреционо право е и родителите не можат да знаат кој наставник е вакциниран и кој не е, како што ние не можеме да знаеме кој ученик е вакциниран или кој не е. Точно е дека се промени перцепцијата во однос на многу работи откако изби пандемијата со коронавирус, но на крајот се се сведува на личниот став на просветниот работник“ вели Томислав Гиевски, претседател на Независниот синдикат за образование и наука.
Министерството за образование и наука веќе го објави Планот за одржување на наставата со физичко присуство на учениците во основите и средните училишта во новата учебна година, како и протоколите.
Сите деца ќе се вратат во училишните клупи, но се оставаат и две резервни сценарија – со поделба во групи или онлајн-настава, во случај да се влоши епидемиолошката состојба.
Петар Догов