Селекторот на македонската фудбалска репрезентација, Игор Ангеловски жали што неговите избраници не стигнаа до позитивен резултат против Украина (1-2).
Очекувано тој беше позадоволен од играта во второто полувреме и тогаш Македонија покажа дека не е случајно на ова Европско првенство.
„Одигравме меч со две различни полувремиња, но во второто покажавме зошто сме дел од Европското првенство, дека имаме квалитет, дека сме заслужено помеѓу европскиот крем. Кога навивачите ќе ве испратат со ваков аплауз после пораз, значи дека добро сме одиграле. Но, многу ми е криво што целиот овој меч не е заокружен со позитивен резултат. Ние сме победени, но не сме поразени. Тоа денеска го покажавме, дека заслуживме да играме на ова ЕП и дека овие фудбалери треба само вака да продолжат, како што беше во второто полувреме и во следните мундијалски квалификации, а прво да го одиграме вака и целиот натпревар со Холандија за четири дена“, рече Ангеловски