Предлог планот за деблокирање на бугарското вето за почетокот на македонските преговори со ЕУ, кој денеска во Софија го презентираа шефот на португалската дипломатија Аугусто Сантош Силва и еврокомесарот за проширување, Оливер Вархеи, е неприфатлив за бугарските власти, пренесуваат медиумите во соседната земја.
Според овие негативни реакции, станува збор за предлог кој во суштина е многу сличен со идеите на германското претседателство за надминување на спорот.
Бугарските политичари се незадоволни затоа што овој предлог ги релоцира барањата на официјална Софија во процесот за стабилизација и асоцијација, каде не се носат оперативни одлуки.
Агенцијата БГНЕС пишува дека португалскиот предлог вклучува паралелни еднострани декларации од Бугарија и РСМ, и тоа го оценува како целосно апсурдно, бидејќи двете земји имаат билатерален договор потпишан на 2 август 2017 година и депониран во ООН.
„Откако сме сведоци како властите во Скопје три години не го спроведуваат овој договор, кој ќе поверува дека нов декларативен и правно необврзувачки документ ќе доведе до негова имплементација?“, прашува агенцијата..
Според овие информации, португалскиот предлог бил „РСМ да признае дека македонскиот јазик бил кодифициран во 1945 година“.
За Бугарија спорот е во потеклото на јазикот и тие инсистираат дека неговиот корен, како и генезата на македонската нација, се бугарски.