Крајно несоодветно решение кое може да биде проблематично не само од аспект на дискриминација туку и нарушување на индивидуалните и граѓанските права. Вака професорката Мирјана Најчевска го оценува предложеното законско решение за лични карти, во кои треба да се внесе етничката припадност. Бара негово итно повлекување од процедура.
Внесувањето на етничката припадност во личната карта е барање на БЕСА кое беше услов за коалицирање со СДСМ. Доби подршка и од другите партии од албанскиот блок ДУИ, Алијанса на Албанците и Алтернатива. Најческа предупредува дека политичките договори не мора секогаш да се имплементираат.
Додека СДСМ се воздржани по ова прашање и бараат преку дебати и аргументи да се изготват законските измени, ВМРО-ДПМНЕ не гледа ништо спорно во понудениот предлог. За нив е прифатливо во личната карта да има графа за етничка припадност.
Апсолутно не гледаме ништо спорно во личните карти да стои националниот идентитет. За жал има и такви парламентарни партии кои од страна му служат на Заев, кои се обидуваат да го спречат сето тоа. Зошто тоа да го опструираме, зошто да му слугуваме на Заев кој има политички договор со Беса и сега бара преку некои странични партии да се нанесе штета, обвинуваат од ВМРО-ДПМНЕ .
На измените се спротиставија и политички партии кои се дел од владејачкото мнозинство. Предлагачите, четворицата пратеници од БЕСА сметаат дека припадниците на етничките заедници имаат право да ја искажат својата етничка припадност и преку личната карта, како јавна исправа со која се искажува идентитетот, живеалиштето и државјанството.
Јулијана Пешевска