Со негирањето на македонскиот јазик во одредени политички околности на кои сведочиме денес најмногу на удар е творештвото на академик Блаже Конески, како еден од кодификаторите на современиот македонски литературен јазик, забележа претседателот Пендаровски во своето поздравно обраќање на почетокот на Првата зимска школа со која и официјачно започна чествувањето на големиот јубилеј 100 години од раѓањето на Конески.
Во период кога, за жал, од политички причини, повторно се негира постоењето на македонскиот јазик, иако тој е одамна верификуван од светската лингвистичка наука, токму делото на Конески е најмногу на удар. Во таа смисла, еден од најцврстите бедеми во одбраната од неаргументираните и често ирационални напади е Меѓународниот семинар за македонски јазик, литература и култура кој зад себе има веќе пет и пол децениска традиција со повеќе од петстотини учесници од шеесетина земји од сите меридијани на светот, рече претседателот Стево Пендаровски.
За македонистите токму Меѓународниот семинар за македонски јазик, литература и култура во сите изминати години е само уште една потврда за апсурдноста на оспорувањето на македонскиот јазик.
Замислете нешто што е кодифицирано од таа 1945 –та и на која што се создала една велелепна литература на која што можам слободно да кажам една европска култура и вие нешто да негирате. Семинарот за македонски јазик има повеќе од 50 години активно учество во славистиката и славистичкиот контекст, вели проф. д-р Весна Мојсова – Чепишевска, директорка на МСМЈЛК
Фигурата на Конески како раскошен поет, филолог, препејувач и преведувач, книжевен критичар и есеист е непресушен извор за истражување, додава Мојсова – Чепишевска.
И некој сега во 2021 година, во годината кога славиме 100 години од раѓањето на Конески да ви каже дека јазикот ви излегол од некој друг јазик мислам дека е неразумно и воопшто е надвор од европскиот концепт и од правото секој да зборува на својот јазик, да се изразува и да ја развива својата научна и културна мисла, вели Чепишевска.
На оваа прва зимска школа која се одвива онлајн и во чиј фокус е великанот Блаже Конески учествуваат 50 странски семинаристи кои имаат можност да проследат 40 часа квалитетна лекторска настава.
Нина Стефанова