Комисијата за европски прашања почна неевропски, со 45 минути задоцнување, но заврши со едногласна поддршка на Законот за попис. ВМРО ДПМНЕ побара да се дефинира кои документи ќе се прифаќаат, кои бази на податоци ќе се користат, да се прави разлика меѓу живеалиште и престојувалиште, хартиен не само електронски образец, двајца непосредни попишувачи наместо еден. За да се добие реална слика за резидентното население, велат, треба да се преиспита можноста дијаспората да се самопопишува преку апликација.
За власта е важно што ниту еден државјанин нема да остане непопишан.
Алијанса-Алтернатива го смета пописот за политичка не само статистичка операција, бидејќи некои колективни права зависат од резултатите.
СДСМ изрази подготвеност да разговара за некои решенија како што се врзан потпис на директорот и заменик директорот на Заводот за статистика или бројот на попишувачи.
Наредната недела, законот е на пленарна седница, по што следува амандманска расправа. Се планира да биде донесен до крајот на овој месец, за да може да се реализира во април. Годинава беше одложен заради предвремените парламентарни избори.
Соња Николовска