Раководствата на градинките ќе бараат вакцинација против Ковид-19 и на вработените во кујните, воспитувачки, негувателки, администрација и технички персонал. Сметаат дека тие се во ризичните професии, а нивните врати за згрижување на децата се отворени и без разлика на проблемите успеваат да се снајдат и да работат. Директорката на детската градинка „Астибо“ Билјана Трајчевска вели дека оваа иницијатива ќе ја презентираат на министерката за труд и социјална политика, а идејата е вакцинацијата да биде на доброволна база.
Во објектите на нашата градинка почнува да се стабилизира состојбата со заразени вработени, пополека се враќаат на работа, но за жал од компликации од вирусот ни почина куварот од едната смена. Тешко е во овие моменти и да се најде стручен кадар. За вакцинацијата против Ковид-19 е идеја и наше размислување, а се надевам дека надлежните институции ќе размислат за неа, вели Билјана Трајчевска, директор на детската градинка „Астибо“
За разлика од пред две недели кога градинките и сите штипски институции беа преполовени со бројот на вработени, деновиве состојбата со заразени со коронавирусот и лица кои се во изолација почнува да се стабилизира. Во регионалниот Ковид центар хоспитализирани се 59 пациенти, од источниот регион, но загрижува тоа што 30 се на кислородна поддршка, а во изминатите 24 часа битката со вирусот ја загуби 81 годишен пациент од Штип.
Викторија Димитрова Јованова