Нема простор и законски услови за нова амнестија, можно е да се искористи мерката условен отпуст за затвореници со помали казни, осудени за полесни дела кои веќе одлежале три четвртини од казната за да се намали затворската популација и да се спречи поголема епидемија во затворите.
Ова било разгледувано на работната група составена од повеќе институции од правосудниот сектор, МВР и здравство која треба да ја најде решение за спречување на ковид зад решетките. Во моментот 27 затвореници од кои 25 во Идризово се заразени и сместени во приемното одделение во најголемиот македонски затвор.
Двајца заболени се во затворот Шутка во посебни келии. Бројката се стабилизира и состојбата се држи под контрола, велат од затворската управа, иако потврдуваат дека во Идризово има и цели затворски крила кои се во изолација затоа што таму 228 осуденици се изолирани. Заболени има и во стражарската служба, во сите зсатвори има 40 активни Ковид случаи и приближно толку во изолација.
Најмногу се во Идризово, а заболени затворски полицајци има во Шутка и во Охрид. Решението се гледа во намалување на затворската популација, иако поради законските обврски веќе се доставени и нови упатни акти за издржување на затворски казни за до 27-ми декември да се пријават и заминат во затвор уште неколку десетици нови затвореници.
Работната група планира стопирање на дел од овие решенија, како и пуштање со условен отпуст за оние осуденици кои се пред крај на престојот зад решетките. Сепак најлошо е во затворените одделенија во затворите, а и денеска неколкумина затвореници и нивни сопруги се јавуваа и се ќалеа на лошите услови за сместување во карантин каде се сместени во Идризово.
Таму заразените се сместени во приемното одделение од каде испратија и снимки кои во текот на оваа недела ги објави Телма. На снимките се гледаат просториите во кои се сместени Ковид затворениците кои бараат подобри услови и поголема здравствена грижа. Од Управат за извршување санкции ни одговорија дека капацитетите не дозволуваат поинаков начин за сместување и дека се надеваат оваа недела, работната група да понуди решение за да се намали бројот на осуденици.
Миомир Серафиновиќ